Բացահայտիր Սյունիքը․ Հարժիսի (Որոտանի) լիճ
Հարժիսի լիճը, որը հայտնի է նաև Որոտանի լիճ անվանմամբ, Սյունիքի մարզի աչքի ընկնող բնական ջրավազաններից է։
Այն աչքի է ընկնում իր յուրահատուկ տեղադրությամբ և շրջակա լանդշաֆտի վայրի գեղեցկությամբ՝ գրավելով արշավականների, էկոտուրիզմի սիրահարների և բնության լուսանկարիչների ուշադրությունը։
Լիճն ունի տեկտոնական ու փլվածքային ծագում։ Այն առաջացել է Որոտան գետի հունում՝ լեռնային ապարների փլվածքի հետևանքով, ինչի արդյունքում գետի հոսքը բնականորեն ամբարվել է՝ ձևավորելով բնական այս ջրամբարը։
Գտնվելով ծովի մակերևույթից մոտ 1195 մետր բարձրության վրա՝ լիճը ներդաշնակորեն միախառնվում է Որոտանի կիրճի խորհրդավոր ու ժայռոտ տեսարաններին։
Հարժիսի (Որոտանի) լիճը նաև կարևոր կետ է տարածաշրջանի արշավային երթուղիներում։ Այն հատկապես լավ տեսանելի է Հարժիս գյուղից դեպի Տաթևի վանական համալիր տանող ճանապարհատվածն ու արշավային երթուղին անցնելիս, որտեղից բացվում է տպավորիչ տեսարան դեպի կիրճի խորքում թաքնված ջրային այս հայելին։
Տեղակայումը՝ ՀՀ Սյունիքի մարզ, Հարժիս գյուղից 1.6 կմ հարավ, Որոտանի կիրճ։
Կոորդինատները՝ 39°25'05"N 46°13'18"E (39.4180° N, 46.2217° E)։
Լուսանկարը`Armgeo. am-ի