Բացահայտիր Սյունիքը-Գեղիի ջրամբար
Գեղիի ջրամբարը գտնվում է Հայաստանի Հանրապետության Սյունիքի մարզում՝ Գեղի գյուղի մոտակայքում։
Այն կառուցված է Ողջի գետի ձախակողմյան վտակի՝ Գեղի գետի վրա։
Ջրամբարի հայելին գտնվում է ծովի մակերևույթից 1402 մետր բարձրության վրա։
Այս տպավորիչ հիդրոտեխնիկական կառույցի պատվարը ավազակավային միջուկով քարալցվածքային տիպի է։
Այն ունի 70 մետր բարձրություն և 244 մետր երկարություն, իսկ կատարային (վերին) մասում լայնությունը կազմում է 10 մետր։
Պատվարի շրջանում ֆիլտրացիոն երևույթների կանխարգելման նպատակով 20-60 մետր խորության սահմաններում իրականացվել են հատուկ ցեմենտացման ծավալուն աշխատանքներ։
Գեղիի ջրամբարի ընդհանուր ծավալը կազմում է 15 միլիոն խորանարդ մետր, որից օգտակար ծավալը 12 միլիոն խորանարդ մետր է։ Ջրային մակերեսը (ջրի հայելին) զբաղեցնում է շուրջ 50 հեկտար տարածություն։
Ջրամբարը նախագծվել է 1980 թվականին «Հայհիդրոէներգանախագիծ» ինստիտուտի կողմից, իսկ շինարարական աշխատանքներն ավարտվել են 1989 թվականին։
Թեև ի սկզբանե այն նախատեսված էր որպես էներգետիկ նշանակության կառույց, սակայն հետագայում սկսեց շահագործվել բացառապես մելիորատիվ (ոռոգման) նպատակներով։ Ներկայումս ջրամբարի ջրերով ապահովվում է Կապանի տարածաշրջանի հողատարածությունների ոռոգումը։
Կոորդինատները. 39°13′11″N 46°13′08″E