Բացահայտիր Սյունիքը-Գորիսի «Զանգեր» հուշարձան

Գորիսի «Զանգեր» հուշարձանը Սյունիքի ամենատպավորիչ և ինքնատիպ ճարտարապետական կոթողներից է, որը վեր է խոյանում լեռնային բնապատկերների և քաղաքի համապատկերի ֆոնին:

Այն ոչ միայն յուրօրինակ կառույց է, այլև ունի հետաքրքիր պատմական ուղի՝ սերտորեն կապված քաղաքի ինքնությանը:

​Հուշարձանի նախատիպը կառուցվել է 1980-ական թվականներին՝ տաղանդավոր ճարտարապետ Սևադա Զաքարյանի նախագծով: Այն սկզբնապես գտնվում էր Գորիս քաղաքի մուտքի մոտ և ժողովրդի կողմից ստացել էր «Զանգեր» անվանումը: 2001 թվականին պատմական հուշարձանը քանդվել է, և դրա տեղում կառուցվել է նորը: Սակայն տարիներ անց որոշում կայացվեց վերականգնել քաղաքի սիրված խորհրդանիշը:

2017 թվականի դեկտեմբերին Գորիս-Ստեփանակերտ մայրուղու աջ հատվածում մեկնարկեցին քանդված հուշարձանի վերակառուցողական աշխատանքները, որոնք ավարտվեցին 2018 թվականի հուլիսին:

Կառույցի ճարտարապետը կրկին Սևադա Զաքարյանն էր: Նորակառույց հուշարձանի հանդիսավոր բացման արարողությունը տեղի ունեցավ 2018 թվականի հուլիսի 7-ին, ինչը համընկավ «Գորիսը ԱՊՀ մշակութային մայրաքաղաք» միջոցառումների մեկնարկի օրվա հետ։

​Այս ինքնատիպ կոթողը կառուցված է տեղական բնական քարից, ինչի շնորհիվ այն կատարելապես միախառնվում է շրջակա լանդշաֆտին։ Իր ճարտարապետական տեսքով այն հիշեցնում է ավանդական կամարակապ անցումներով ու սրածայր աշտարակներով մի ամրոց, որի գագաթներին մեծ քարեր են տեղադրված։

Այն հանգստի հրաշալի վայր է և ծառայում է որպես դիտակետ, որտեղից բացվում է Գորիս քաղաքի հիասքանչ տեսարանը։

​Հուշարձանը գտնվում է Գորիս-Ստեփանակերտ մայրուղու աջ մասում:

​Տեղակայումը. Գորիս-Ստեփանակերտ միջպետական մայրուղու աջակողմյան բարձրադիր հատված, Սյունիքի մարզ, Հայաստան։

Կոորդինատներ. 39.516520, 46.353381