Բացահայտիր Սյունիքը-Բերդալիճ՝ Սյունյաց կապույտ մարգարիտը

Սյունյաց հրաշալիքներից մեկն է Բերդալիճը։

Այս բարձրադիր լիճը ոչ միայն աչքի է ընկնում իր վճիտ ու սառնորակ ջրերով, այլև հրաշալի ուղղություն է նրանց համար, ովքեր ցանկանում են կտրվել քաղաքային աղմուկից և զգալ բարձրլեռնային բնության հզոր շունչը:

​Բերդալիճը գտնվում է Սյունիքի մարզի և Արցախի սահմանագլխին՝ Սյունիքի բարձրավանդակի խրոխտ լանդշաֆտում։

Այն ծովի մակերևույթից ունի տպավորիչ 3020 մետր բարձրություն, ինչը նրան դասում է Հայաստանի ամենաբարձրադիր լճերի շարքին:

Այսպիսի բարձրության վրա նույնիսկ ամռան տապին կարելի է հանդիպել լճափին պահպանված ձյան շերտերի, որոնք կապույտ ջրի և հրաբխային ապարների ֆոնին ստեղծում են կոնտրաստային ու անիրական գեղեցիկ տեսարան:

Լճի հայելու մակերեսը կազմում է շուրջ 5 հեկտար, իսկ ջրահավաք ավազանը տարածվում է 5 կիլոմետր քառակուսու վրա՝ սնվելով հիմնականում հալոցքային ջրերով և սառնորակ աղբյուրներով:

​Դեպի Բերդալիճ տանող ամենահարմար մեկնարկային կետերից մեկը Սյունիքի Ծղուկ գյուղն է, որից լիճը գտնվում է մոտ 10 կիլոմետր դեպի հյուսիս-արևելք։ Ճանապարհն անցնում է ալպյան գոտու գունագեղ մարգագետիններով և քարքարոտ արահետներով, ինչը պահանջում է համապատասխան պատրաստվածություն և ամենագնաց մեքենաների առկայություն:

Այս տարածաշրջանը հարուստ է նաև հնագիտական հուշարձաններով, մասնավորապես՝ Ծղուկի հայտնի ժայռապատկերներով, ինչը լճի ուղղությամբ արշավը դարձնում է ոչ միայն բնաճանաչողական, այլև պատմամշակութային բացահայտումներով լեցուն ճամփորդություն:

​Տեղակայումը. Հայաստան, Սյունիքի մարզ / Արցախ, Ծղուկ գյուղից 10 կմ հյուսիս-արևելք։

Կոորդինատներ. 39.6385, 45.9221