Բացահայտիր Սյունիքը-Լիճքի հեքիաթային ջրվեժները
Լիճքի հիասքանչ ջրվեժները գտնվում են Հայաստանի հարավում՝ Սյունիքի մարզի հեքիաթային անկյուններից մեկում։
Այս բնական հրաշալիքները ձգվում են Լիճք գյուղի տարածքով հոսող երկու՝ Մեղրի և Զվարագետ գետերի վրա։
Ջրվեժների հիմնական համալիրը սկսվում է Լիճք գյուղից մոտ 2 կմ դեպի հյուսիս և կիրճով ու գետի հունով ձգվում դեպի վեր՝ հասնելով մինչև անտառի վերջը։
Այս վայրն առանձնանում է իր յուրահատուկ ջրվեժների կասկադով, որոնք կիրճի մեջ թափվում են միմյանց վրա՝ ստեղծելով տպավորիչ տեսարան։
Մեղրի գետի վրա գտնվող ջրվեժների ստույգ քանակը դժվար է նշել, քանի որ դրանք հասնում են մի քանի տասնյակի։
Ինչ վերաբերում է Զվարագետի վրա գտնվող ջրվեժներին, ապա դրանցից չորսն առավել մատչելի են և տեղակայված են միմյանցից փոքր հեռավորության վրա։
Նույն գետի վրա կան նաև այլ ջրվեժներ, որոնք թեև համեմատաբար դժվարամատչելի են, սակայն իրենց գեղեցկությամբ ու վեհությամբ ոչնչով չեն զիջում առաջիններին։
Այս հիասքանչ բնական էկոհամակարգը սնող Մեղրի գետը սկիզբ է առնում Մեղրու լեռնաշղթայի հարավային լանջերից՝ մոտ 3300 մետր բարձրությունից։
Գետի ընդհանուր երկարությունը կազմում է 36 կմ, իսկ ջրհավաք ավազանը զբաղեցնում է 336 կմ² տարածք։
Դեպի Լիճքի կասկադային ջրվեժներ տանող ճանապարհը հիանալի ուղղություն է քայլարշավների սիրահարների համար։
Գյուղից դեպի ջրվեժներ տանող քայլարշավային երթուղու երկարությունը կազմում է մոտ 2 կմ, որն անցնում է գեղատեսիլ բնության միջով և հասանելի է ոտքով ճամփորդողների համար։
Լիճքի ջրվեժները տեղակայված են Հայաստանի Հանրապետության Սյունիքի մարզում, Մեղրի համայնքի Լիճք գյուղական բնակավայրի հարակից տարածքում, իսկ դրանց աշխարհագրական կոորդինատներն են՝ 39.0628° N, 46.1822° E։
Լուսանկարները`Հատիս տուր-ի