Ձերբակալվել է 8 անձ, այդ թվում՝ Մեղրի համայնքի ղեկավարը․ Հակակոռուպցիոն կոմիտեն հաստատեց

Հակակոռուպցիոն կոմիտեն հաստատեց 24News-ի տեղեկությունը՝ ձերբակալվել է Մեղրիի քաղաքապետ Խաչատուր Անդրեասյանը։

«Ի պատասխան հաստատում ենք, որ կաշառք տալու և ստանալու դեպքերի առթիվ ՀՀ հակակոռուպցիոն կոմիտեում նախաձեռնված քրեական վարույթի շրջանակում ձերբակալվել են 8 անձինք, այդ թվում՝ Մեղրի համայնքի ղեկավարը և Էկոպարեկային ծառայության Սյունիքի մարզային ստորաբաժանման ղեկավարը»,-ասաց ՀԿԿ խոսնակ Մարինա Օհանջանյանը:

Նախաքննության շահերից ելնելով՝ այլ տեղեկատվություն չհայտնեցին։

Ավելի վաղ հայտնել էինք, որ Հակակոռուպցիոն կոմիտեն ձերբակալել է Մեղրիի քաղաքապետ Խաչատուր Անդրեասյանին։ Մեր տեղեկություններով, ենթադրյալ կաշառք տալ/ստանալուն է վերաբերվում գործը, ինչի շրջանակում ձերբակալվել է Անդրեասյանը։

Խաչատուր Անդրեասյանը Մեղրի համայնքի ղեկավարի պաշտոնը զբաղեցնում է 2024 թվականի մայիսի 30-ից։ Նշենք, որ Խաչատուր Անդրեասյանը «Քաղաքացիական պայմանագիր» կուսակցության Մեղրիի տարածքային կառույցի խորհրդի նախագահն է։

Մերի Մանուկյան